سالفــــــة + تحديث

كل عام و انتو بخير و صحة و سلامة يارب

و إن شاء الله تكون سنة خير على الجميع و أولنا الكويت

.
_____________________________________________________

.

.

بنت خالي عندها بنت عمرها سنتين و نص و ما شاء الله تبارك الرحمن تينن وايد حلوة و أحلى مافيها عيونها تقولون مرسومة رسم ... بس العين حق و مذكورة بالقرآن ماتخلي أحد بحاله ذيج الليلة البنت كانت نايمة قعدوا الصبح ولا ورمة شكبرها على عينها الله يكافينا و ياكم الشر و يطيرون فيها الأم و الأبو أمريكا يروحون ذاك المستشفى اللي من أصغر موظف لي أكبر دكتور ديانتهم الديانة اليهودية ... و بنت خالي متحجبة فتبين انها مسلمة ... تقولي من دخلنا عندهم و اهما شايلينا شيل وايد يهتمون بمرضاهم و أهل المريض لدرجة انهم يحطون لكل مجموعة من المرضى طبيب نفسي لأهله عشان يريحهم و يهديهم و يشرحلهم المرض أو أعراضه بطريقة بسيطة و يهون الوضع عليهم شوية ... تقولي كل شوية سستر يايتني و تلمني عقب ما تسمع قصة بنتها و شلون انها صغيرة ... بعد المرض ما يعرف صغير و لا جبير

الطبيبة النفسية اللي تشرف على بنت خالي و بنتها و ابوها ... لاحظوا انها يهودية ... تقولهم الرب يحب يسمع مناجاة عبده و يختبر منو المؤمن و منو اللي يحمده و يشكره على البلاء اللي هو فيه و بيشوف مدى صبره و اللي عليكم تسوونه انكم تصلون لها و تحمدون ربكم على النعم اللي انتو فيها ...

تقولي بنت خالي يوم العملية الطبيبة كانت قاعدة ويانا ما هدتنا مولية و كل ساعة تقول صلوا ... قصدها ادعوا !!! هذي يهودية ... أرحم ألف مرة من الدكاترة المسلمين اللي عندنا

المهم سووا العملية و بعد قلبي شالوا عينها طلع فيها المرض الشين أعوذ بالله منه حبيبتي و حطولها عين زجاجية و الحمدلله على كل حال

.

و ألحين سالفة ثانية ... رفيجتي مسوية عملية براس بنتها عند استشاري ... لاحظوا استشاري ... و الاستشاري الدايخ ناسي قطن براس البنت ... طبعا رفيجتي مادرت إلا بالصدفة سمعته يتحجى بالتلفون ... دشيت عليه مصدومة خايفة على ظناها تقوله شلون ما كو عواقب أو يأثر عليها ... طبعا انا مختصرة وايد اللي صار - تهاوش ريلها مع الدكتور و بغى يطقه و الام تصارخ عليه - قصة ... تهقون شنو رد عليها ؟

.

يقولها حمدي ربج ما نسيت المقص !!!! حسبي الله عليك دنيا و آخرة اهيا حامدة ربها و شاكرته من قبل لا تشوف رقعة ويهك ياللي ما تخاف الله و ألحين اهيا رافعة قضية على الاستشاري ... قلعته

.

.

شوفوا شلون معاملة اليهود للمسلمين حتى لو القصد منها ربح مادي بس على الأقل معاملة انسانية و بالذات اهما دكاترة يعني المريض ما اييكم إلا تحت رحمة ربه و رحمتكم ... عكس معاملة المسلمين اللي عارفين القرآن و أخلاق اللي المفروض يتحلى فيها كل مسلم مو كل طبيب إلا كل مسلم ... بس شتحاجون ... الشكوى لله

.

.

رجاء لحد ايبلي طاري اليهود شسووا بفلسطين ذيلاك بروحهم يهود و املعن ... قلعتهم استغفر الله

و على فكرة ادري بالفرق بين اليهود و الصهاينة ... بس مو هذا موضوعنا

^_^